Sumbang Duo Baleh
Materi Pesantren Ramadhan

Gambar : Materi sumbang 12 di SMAN 5 Padang disampaikan oleh yenni putri

Materi pesantren ramadhan di SMAN 5 Padang adalah materi kearifan lokal yaitu sumbang duobaleh. Sumbang Duobaleh adalah suatu perbuatan yang dilarang oleh adat minang kabau. Larangan tersebut ada 12 jenis. Yang sumbang jangan dilaksanakan. sumbang 12 terdiri dari :

1. sumbang duduk , Duduak Padusi Minangkabau iyolah basimpuah. ijan sakali-kali duduak baselo cando laki-laki, nan paliang tacelak bana kalau mancangkuang, mancongkong atau sabalah lutuik batagak an sarupo urang duduak di lapau. Kok duduak di bangku ku risi rapek an pao arek-arek, manyampiang agak sa layang. Malu awak kok mamakai orok singkek, indak tahu jo adaik kecek urang. Nyampang kok duduak babonceng ijan mangangkang gadang gadang, manjajok di pandang urang. Jikok awak laki-laki ijan duduk ba simpuah lo bantuak anak padusi, duduaklah baselo, tagak an pungguang supayo gagah nampaknyo

2. sumbang tagak, Usah panagak di tantang pintu atau di janjangturun naiak, usah panagak di tapi labuah kalau tak ado nan dinanti. sumbang tagak jo laki-laki, apolai indak jo mahram. Konon pulo barundiang-rundiang sambia tagak

3. sumbang jalan,

Bajalan musti ba kawan, paliang kurang jo paja ketek, kalau padusi bajalan surang, saibaraik alang-alang lapeh, jatuah merek turun harago, randah pandangan laki-laki. Usah bajalan ba gageh-gageh, malasau mandongkak-dongkak, co ayam gadih ka batalua, usah tapi bajalanlah siganjua lalai, pado tampuah suruik nan labiah, alu tataruang patah tigo, samuik tapijak indak mati, aratinyo lamah lambuik, gemulai tapi tageh. Kok bajalan jo samo gadang jan babanja ma ampang labuah, agak’i urang di bulakang, kok bajalan jo urang tuo atau jo urang laki-laki, awak ma iriang di bulakang, bak nantunlah adaik ka dipakai.

4. Sumbang Kato, “Bakatolah jo lunak lambuik, duduak an etongan ciek-ciek, nak paham urang mukasuik nyo. Sumbang bana dek padusi barundiang co murai batu, bak aia sarasah tajun, rumik lah urang mamilahi. Kalau rang tuo sadang mangecek, pantang mamotong keceknyo, nantikan dulu sudah2. Manjawek nan patuik dijawek, baalamaik. Dakek urang sadang makan usah mangecek nan kumuah2. Pai manjanguak urang sakik usah carito urang mati. Kurang tapuji manunggu utang di nan rami. Manyabuik harimau di tangah hutan. Bak nantun ajaran sopan santun”

5. Sumbang calik, Mancaliak nana ka nan jauah,  Acok Mancaliak ka balakang, Mancaliak saisi kamar/rumah urang lain (sarupo manyalidik), Mancaliak jam bilo ado tamu, Mancaliak incek mato laki-laki atau padusi lamo lamo, Mancalaik aurat urang, Mancaliak nan indak sanonoh.

6. Sumbang makan, Makan atau minum sambia tagak, kunyah kenyoh sapanjang jalan. manguyah tutuikan muluik, jan tadanga capak dek urang, sabab nan makan mancapak-capak, bangso si lupak jo si sa muik, kuranglah sopan jo taratik, kalau mahota sambia makan caro si bule dalam pilem. Kok awak makan jo tangan, angkek na si jo ujuang tangan, suok nan usah gadang2. manambuahkan nasi agak2, bia acok asakan saketek, jan sampai piriang balanjuang, biasokan mancuci tangan, manuangkan aia dalam piriang, jo kida manjambo galeh, minum sataguak taguak ketek, tahan sandao jan nyo lapeh. Nyam pang awak makan basendok, jan balago sendok jo garpu, badariang kanai di gigi,

dimasalasai makan beko, tungkuikkan sen dok jo garapu, kalau lataknyo tatilantang tandonyo makan alun kanyang ataupun ku rang samalero, Jan sendok disilang nantun simbol ugamo rang lain.

Tasingguang urang punyo alek. Nah… paratikan bana tu nak kanduang… jan randah pandangan urang

7. Sumbang Pakai

Babaju jan sampik-sampik, nak jan nampak rasio tubuah, dima bukik dima lurahnyo, dima taluak tanjuang baliku, jadi tontonan laki-laki, usah pulo talampau jarang, nan tipih nan tambuih pandang, kunun pulo tasimbah ateh bawah, usah… Satantang mode jo potongan, sasuaikanlah jo bantuak badan, sarasian jo ragi kain, buliah sajuak pandangan mato. Dek kulik ayah nan manurun piak, kulik nan karak-karak anguih, mako warno piliah nan agak amba, krem jadih, pucuak pun buliah, birunyo nan talua asin, putiahnyo nan abu-abu, usah dipakai baju sirah piak, dendeng balado kecek urang, badoso umaik karano awak. Katampek urang kamatian pakailah nan polos warno galok. Usah mamakai baju pontong nan ponggeang nampak katiak, usah pulo tabukak tenda mamakai gencu taba2, kurang etis baso kininyo.

8. Sumbang Karajo

Kakok karajo rang padusi sabateh nan ringan2, nan mudah2, nan aluih2, manjaik jo manarawang, ka dapua masak mamasak manyusun paraboik rumah, kok ka sawah batanam jo basiang, manyabik atau maangin, tapi jan mabajak jo mairiak, bak itupun karajo parak, sakadar marambah manyisiak-nyisiak, mangulik manabang pisang, jangga bana dek rang padusi kalau mamanjek bagayuik-gayuik manabang mangabuang kayu.

9. Sumbang Tanyo

Ado papatah mangatokan: Barundiang sasudah makan, batanyo salapeh arak, aratinyo kok urang tibo batandang sambuiklah baramah tamah, jo horomaik. Suruah duduak, latakkan aia, suruah minum, salasai minum agak sataguak, raso lah cukuik lapeh arak, baru tanyoan apo mukasuiknyo, Baso kininyo “apa yang bisa saya bantu, pak/buk?”, Kasa lah bana budi awak, alun tacacah ikuanyo, sambia tagak lalu batanyo pulo, “a tujuan datang kamari?”, indak buliah tu nak. buruak angkuah namonyo awak. Salain nan dari pado nantun, kok tamu awak sadang makan, sumbanglah bana manayoan “bara harago bareh kini” indak buliah tu, pantangan urang Minangkabau bana tu nak.Ciek lai, kalau bajalan dalam hutan, usah batanyo isi rimbo, ula, harimau jo biruang. indak buliah !Kok masuak ka kampuang, pantang batanyo ka urang lapau, “lai mamak manjua sabuak?”, atau “mintak tambah gulo stek mak”, jan ..! mati gadih kau dibueknyo beko piak, indak buliah tu.”

10. Sumbang Jawek

Kalau ado urang batanyo, elok2 mambari jawek, jan sampai urang tasingguang dek awakmpamo urang ka babalanjo batanyo ka tukang kain, tukang kain ko anak gadih lo, a katonyo “bisa limo puluah ribu sameter piak ?” dijawab dek urang kadai: “ampek ribu awak tarimo pak, baok kamari bara ado”, tibo pulo tanyo nan lain “luntur ndak diak ?”, sambia malengah nyo manjawab “pai bata nyo ka pabrik pak, kami nan tau manjuaan sajo”.nantun jawab sengkang namonyo tu nak, buruak muncuang malayani urang, cilako gadih mudo matah, jauah jodoh tinggi rasaki, alamaik sansaro iduik awak, indak buliah !

11. Sumbang Bagau

Indak buliah bagaua jo laki-laki kalau awak sajo padusi surang mancampua bakeh nan banyak, sumbang bagaua samo gadang kalau bakumpua-kumpua.Lalok batandang ka rumah urang kacuali ado paralu, dek awak tu anak gadih.sumbang bagaua jo paja ketek, sato pilo manyuruak bakuciang-kuciangan, basimbang main kalereng balari bakaja-kaja. Atau bapacaran alah sarupo laki bini, ilia mudiak indak lakek lakang, sarupo jawi jo lapiak buruak, sumbang gadang tu…!!!

12. Sumbang Kurenah

Adopun nan dimukasuik jo kurenah, iyolah galagaik, pambaoan, sipaik, tabiaik, parangai. Karakter kecek rang kini, sikap mental caro moderen. Indalah patuik kalau babisiak baduo-duo sadangkan awak sadang batigo, kurang lamak kurang lah elok malucu mambuek garah mahota bakarikikan dalam manjanguak batakziah, indak buliah galak mancaliak urang jatuah,indak buliah manutuik iduang di tangah urang rami, atau kuok mangango laweh2, tamasuak juo sumbang kurenah, mangakok jo tangan kida, saumpa mo manjambo jo manampuang, manunjuak atau maimbau, malambai-lambai darijauah. Indak pandai manenggang raso sumbang juo tu namonyo, mako dari tu, kok awak Mambali durian, kuliknyo usah dikaka nak, jan serak an bijo di laman, pikiaan urang di subalah, luko kaki lukolah iduang luko di batin nan manyeso, badantiang tali silaturrahmi

---

Video Terkait: